८.पुरस्कार तथा अन्य गतिविधिहरू

मनराम प्रतिष्ठानका संस्थापक अध्यक्ष स्वर्गीय श्री राम बहादुर श्रेष्ठको स्मृतिमा मनराम एसकेएजे पत्रकारिता पुरस्कारको सुरुवात गरिएको छ । संखुवासभा जिल्लालाई कार्यक्षेत्र बनाइ सक्रिय रहने एकजना पत्रकारलाई नगद रू. २५०००.०० (रुपैयाँ पच्चीस हजार) राशिको उक्त पुरस्कार वार्षिक रुपमा प्रदान गरिँदै आएको छ ।

पुरस्कारको उदेश्य सम्बन्धित क्षेत्रमा क्रियाशील उच्चस्तरीय पत्रकारिताको पहिचान गरि प्रोत्साहन गर्नु हो ।

संखुवासभा सापेक्षित रुपमा दुर्गम र विकासोन्मुख क्षेत्र भएकोले स्थानीय समुदायहरूलाई सुसुचित गर्न र सशक्तीकरणका निम्ति पत्रकारिताले महत्वपूर्ण भूमिका खेल्दछ । मनराम प्रतिष्ठानले स्थानीय जिम्मेवार निकायहरूलाई जवाफदेहि बनाउन यस क्षेत्रमा क्रियशील पत्रकारहरुको कार्यक्षमतालाई मुल्यांकन गर्दै समसामयिक सचेतनाका महत्वपूर्ण विषयवस्तुहरुलाई उजागर गर्न सघाउँदै आएको छ ।

यसका साथै संखुवासभाका चर्चित व्यक्तित्वहरू र लोकगाथाहरुलाई मुखरित गराउन अग्रसर लेखकहरूलाई प्रोत्सहान गर्न मनराम प्रतिष्ठान मार्फत उहाँहरूका कृति प्रकाशन गर्दै आएको छ । लायन्स मनराम प्रतिष्ठान अहिले विशेष रुपमा पुस्तकालयहरुको स्थापना र क्षमतावृद्धिमा अघि बढेको छ ।

यी प्रयासहरुका साथमा, प्रतिष्ठानले विपन्न वर्गका विद्यार्थीहरूलाई छात्रवृत्ति र शैक्षिक समाग्री वितरण लगायत सरकारी निकायहरू सँगको सहकार्यमा  निराक्षरता उन्मुलनका अभियान जस्ता सामाजिक सेवाका कार्यहरुमा आफ्नो संलग्नता देखाउँदै आएको छ । 

किवानिस नेपाल डिस्ट्रिक्ट र स्थानीय किवानिस क्लबहरूसँगको सहकार्यमा यस मनराम प्रतिष्ठानले संखुवासभाका विपन्न तथा सीमान्तकृत वर्गका बालबालिकाहरूलाई ३,००,००० (तीन लाख) थान भन्दा बढि अभ्यास पुस्तिका र  कलमहरु, साथै केहि विद्यालयहरूमा कम्प्युटर सामग्रीहरू वितरण गरेको छ ।